من علي القهوة

من ع القهوه
ده تاني جزء بس المره دي قهوه جديده و الحوار كان مع واحد بس
الحوار ده خلاصه 3سنين من عمر الراجل ده
والمره دي حبيت اختار الشخص اللي هتكلم معاه ولاني كنت عاوز اتكلم مع واحد من الشباب
اللي نزل في كل وقفه احتجاجيه وكل حركه وكل حزب  فأكيد مافيش انسب منه وهو #####
بعد ما جبت رقمه واتصلت بيه وعرفته علي طبيعه الحوار  الراجل كان متفاهم جدا ورحب بالموضوع وحددنا ميعاد علي القهوة واتقابلنا
*** ( علي فكره الراجل ده من قريه جنب بني مزار محافظه المنيا) ***
استاذ ##### اخبار حضرتك ايه ?
هو/ الحمد لله بخير
انا/  شرف ليا اني اتعرف علي حضرتك
هو/ ده بس من ذوقك
وبعد السلام والتعارف ندخل في الموضوع
انا/
عرفت ان حضرتك من اكتر الناس اللي نزلت وقفات احتجاجيه كتيره وعاوز اخد ملخص من حضرتك
هو/مبدئيا بلاش حضرتك وانا ما فيش عندي ادني مشكله
بيني وبين نفسي نفسي اسلخه عاوز استفز كل تفصيله فيه (وده مش بالكلام يعني مش هتعرفوا الاستفزاز غير لما اشاور عليه)
اتفضل يا باشا وهات من الاول
هو/انا حاليا طالب في عشرينيات العمر والحكايه بدأت من تلت اربع سنين كان عندي امل في بكره وبعده كنت حاسس بالقرف انا وكل الجيل بتاعي والجيل اللي قبلي بس فنزلت كل مكان كل وقفه احتجاجيه كل حركه وكل حزب هتفت بكل هتاف آمنت بيه اتصبت واتبهدلت كنت لسه في ثانوي عام و مليش صوت انتخابي بس السياسه مش مقتصره علي سن وبطاقه وصوت وده كان بيحركني اني مش لازم يكون ليا صوت بالورق لان الورق بيتسرق وبيتسود في الانتخبات نزلت مع كل اللي نزلوا في بدايه الثوره ودي كانوا الشباب بينادوا عليها من الفيس بوك وقدرنا وحققنا حلم ايوه هو كان حلم كبير ومستحيل بس لما الايام عدت اكتشفنا انه حلم تافه وده لاننا شيلنا حسني وسيبنا نظامه وعياله وتلاميذه وكلاببس ساعتها مش قادر اوصف فرحتنا كانت ازاي والامل اتحول من شعاع لشمس نورها يبان للاعمي في كل مكان وزمان واتخيلنا نفسنا واحنا بنحكي لاولادنا  الانجاز اللي عملناه .
وبعدين اتفاجنا واختلفنا لما لقينا كلب اسود داخل علينا مننا اللي قال لا بصوت عالي كده اتهد كل اللي عملناه ومننا اللي قال ده اللي هيحمينا من بطش الداخليه والبلطجيه بس وقتها الداخليه كانت بح مافيش وقعد معانا المجلس العسكري شويه وساعتها انا حسيت ان الثوره ضاعت خلاص واالمشس نورها  اختفي وامل اتقتلت في المياديين في كل ميدان تاخد طعنه لحد ما خلاص مافيش حته فيها سليمه ممكن بكره يطلع منها امل جديد. 
ونزلت تاني وعليت صوتي وهتفت يسقط يسقط. حكم العسكر وطالبنا بتسليم البلد للمدنيين
انا/ايه رأيك في البرادعي لاني اعتقد انه كان الحصان الاسود بتاع المرحله دي?
هو/البرادعي شخصيه ليها فكر عالي ممكن نقول عليه علماني شويه
انا/ليه?
هو/ اولا دعا بوجود تمثال لبوذا يعني كده بكل بساطه اتاح الشرك بالله عيني عينك وبدون عقاب لانه بكده هيكون ارتد
ثانيا كان بينادي علي حريه مطلقه ومجرده من كل حواجز بطريقه لا تتماشي مع مجتمعنا الشرقي
لكنه فكريا راجل ناضج و متحضر وانا واحد من الشباب كان اكتر شئ عاجبني فيه انه انسان وده طبعا كان واضح من موقفه تجاه فض رابعه العدويه
وكمان من الايجابيات اللي تتحسب ليه انه حرك الشباب وجمعهم زي 6ابريل وغيرها وكل الناس اللي كانت وراه
انا/كفايه كده الفتره دي  ونشوف الانتخابات الرئاسيه?   كنت بتأيد مين? 
هو/ وقتها طبعا كان حلمي وحلم ناس كتير حمدين صباحي لانه راجل بسيط وببساطه كان لازم وقتها نختار مين المرشح اللي شبه البرنامج بتاعه وعلي فكره وقتها ما كانش ليا صوت انتخابي بس ده كان املي
انا/ والاعاده اكيد مرسي طبعا!?
هو/ طبعا كنت شايف الاخوان بغض النظر عن غلطاتهم في شباب الثوره فكان تأييدي لمرسي برغم اني ماكنتش اعرفه مقارنه بكوادر الاخوان زي المرشد والشاطر وطبعا عرفنا مرسي من خلال حملات شباب الاخوان المسلمين وانه فاز بأحسن برلماني علي مستوي العلم في 2005 
انا/ طيب فاز مرسي وكان ايه احسن قرار من وجهة نظرك
هو/ احسن قرار هههه زي ما بيقولوا الحلو ما يكملش
انه اقال طنطاوي وعنان ولسه هنشكره راح مكرمهم  وبدأ الاداء بتاعه في التناقض  ومعاه بدأ مسلسل الغموض  والفتره دي كانت محيره جدا بالنسبه ليا 
  انا /ليه?
هو/ لاني لقيت الثوار بيعملوا تحالف مع الفلول عشان يشيلوا مرسي  والاخوان بيعملوا تحالف مع الحركات اللي انشقت عنهم او اللي كانت بتمثل علينا وتقول انها مش تبعهم وتعارضهم
  فضلت ساكت لحد الاعلان الدستوري وبدأت اتحرك من تاني قبل ما تسألني ليه هقولك لانه كان معروف مسبقا مواده ايه وبينص علي ايه وبمعني صريح مطبوخ زي الدستور الجديد
انا/ طيب نروح للاتحاديه
هو/ههههه دي اغبي حاجه حصلت في السنين اللي فاتت
انا/ليه
هو/ لان المؤيد والمعارض راح لنفس المكان يعني حرب شوارع او حرب اهليه
انا / حركه تمرد?!

هو/ انت شكلك هتورطني والله
حركه تمرد عليها من علامات الاستفهام كتير جدا بس الشئ اللي خلي اغلب الناس دي تسكت انهم طالبوا بنفس مطالبنا بس اللغز هنا ان امين الحزب الوطني والناس اللي معاه هما اللي كانوا واخدين تمرد علي صدرهم وناس من الثوار اللي نزلت معاهم المياديين كانوا مع تمرد  وده تناقض مافيش كلام
انا / انت خدت بالك بدري ولا كنت زي اغلبنا كل همنا نشيل مرسي
هو/ بصراحه وقتها وعشان كده ما انضمتش للحركه دي وده لما اعرف ان امين شباب الحزب الوطني كان مع احنا آسفين يا رييس وبعدين مع تمرد  وفي حاجات حصلت في تمرد مقرفه
يعني ناس تاخد فلوس عشان تنزل وناس تلم من بعضها فلوس عشان تصور ورق الحمله  فحسيت انا الحركه فيها شبهات كتيره
انا /يعني انت كنت مع تمرد ولا لا
هو/ مطالب تمرد اه معاها لان دي مطالبنا احنا  بس الاختلاف معاهم في مطلب واحد هو انتخابات رئاسيه مبكره
انا/ طيب ايه بديل الكلام ده ?
هو/ مجلس ثوري وده لاني كنت شايف اللي هيحصل من خلال اللي حصل قبل كده
انا / 30/6 ?!
هو/ الاثبات ان كلامي ووجهة نظري صح لان كل المنصات اللي كانت بتنادي يسقط يسقط حكم المرشد بعد30/6 كان اغلبهم فلول  وبكده البلد هتكون رجعت في حضنهم من تاني
انا / عملت ايه في الوقت ده?
هو/الوقت ده كان صعب وبالنسبه ليا مفترق طرق انزل مع مين عاوز انزل مع تحالف دعم الشرعيه بس انا مش عاوز مرسي ونزولي لاني ضد فكره عوده الفاسدين  واكتشفت اني لو نزلت مع الاخوان يبقي انا مع مرسي ولو نزلت مع 30 يعني مع 30 وانا لا عوز ده ولا ده 
ونزلت انا. ومجموعه من المستقلين  وقولنا احنا مش مع دول ولا دول ونزلت مره مع المستقلين وناس من اللي معايا طلعت علي المنصه وقولنا القضيه مش مرسي  وان القضيه عسكر وهتفنا بس بدون تجاوب منهم وطردونا
انا/ كده وصلنا لرابعه?
هو /بلاش اتكلم دلوقتي في الموضوع ده
انا/ ليه? 
هو / لان دي منطقه غامضه حتي الان ومش عاوز ادخل في تفاصيلها
انا/ طيب بعد الاحداث دي ايه احساسك ورد فعلك?
هو/ احساس بفقدان الامل  وايقنت ان مرسي مش راجع والمجلس هيشرفنا ويقرفنا شويه وبعدين نزلت وكان نزولي للناس اللي ماتت مش مرسي والاخوان وللاسف بعض اصدقائي اتهموني باني من الاخوان  وناس تقولي بتاخد كام عشان تنزل وحاجه تقرف
انا/ بالعكس انت كان ليك رأي بعكس الناس اللي سلمت للامر الواقع 
هو( بيكمل كلامه) / بدأ ظهور التيار التالت
انا / اللي هيا مسيره حركه احرار 30/8 من ميدان اسفنكس لحد ميدان لبنان واللي كان شعارها يسقط كل من خان عسكر فلول اخوان
هو/ بالضط كده وكل اللي كان في الميدانين دول كانوا اشتراكيين وثوريين وحزب مصر القويه و حركه 6 ابريل
وساعتها حسيت الامل اتجدد في الناس من تاني
طلعت تعبر عن رأيها وان القضيه مش مرسي ولا اخوان زي ما قنا قبل كده وكل المشكله فساد وعسكر
ومانزلتش تاني مع تحالف دعم الشرعيه واتعرض عليا انا واصحابي ننضم لاولتراس رابعاوي ولكننا رفضنا  ووصلت لمرحله الصمت لان اي صوت بيطلع صاحبه بيتكمم ويتسجن  ومات الامل من تاني
انا/ لحد امتي فضلت في البيت? 
هو/ لحد ذكري محمد محمود اتكلمت مع مسئول طلاب 6 ابريل عشان انسق معاه الذكري وللاسف ماروحتش لظروف قهريه  وكانت وقفه احتجاجيه ماوصلتش لمظاهره زي ما اتمنيت وبعده درست فكره الانضمام لحركه احرار ودي حركه كويسه جدا وللاسف الاخوان بيتكلموا عنها لدرجه ان اي حد ممكن يفتكرها حركه اخوانيه لكن العكس تماما هي مش اخوانيه وبكرر اسفي لانها اصبحت محظوره في هذا الوقت بدون اي وجه حق .
انا/ السيسي و كمل جملك ونري فيك مستقبل وطن?! 
هو/ دي طبعا انواع مختلفه من الطبول الزائفه الكاذبه مخابرات حربيه وعسكريه وداخليه عشان يقنعوا نفسهم ان الشعب عاوز السيسي
مع ان بعض الناس اللي ايدوه في عزل مرسي ماكانوش عازينه رئيس وجت مشكله مين الحصان الخسران اللي هينزل قصاده ويتحمل الخساره ومايشككش فيها ويتحمل الاعلام. القذر بتاعنا
وبالمناسبه اتعرض عليا مبلغ مالي ووجبه وعلبه سجاير يوميا لو نزلت  ده مع اني مش مدخن
ونزل قصاده حمدين وما كنتش اتمني انه يعمل كده وللاسف خسر كتير من شعبيته وناسه والناس اللي ساندته ووثقت فيه
انا/ قبل ما نخلص محمد مرسي ?!
هو / مرسي لاحول له ولانفع
انا/ المهله?
هو/ كلام فاضي كده كده كان هيشيله عاجلا ام اجلا
انا/ ايه رأيك في قرار ان الاخوان جماعه ارهابيه? 
هو/ هكتفي ببيت شعر سمعته من واحد صاحبي
مافيش فايده ولا عايده
وكل الناس دي مش راضيه
ولا انا راضي انه يحكمني
وحجرك علي اراء غيرك
بيقهرني ويحزني
بكره يختلف رأيي
عن خططك فتسجني
وتقتلني
انا/ الانتخابات?
قاطعت الانتخابات مع ان برنامج حمدين كان قوي جدا
انا/ شايف البلد ازاي الفتره دي واللي جايه?!
هو/ شايف كرباج وباريهات عسكريه  وناس طموحها مات  واملها اتدفن وكفايه كده
انا / شكرا. ليك جدا  
في النهايه زي كل مره لازم اشدد علي تقبل الرأي الأخر
لاننا مش هنتقدم الا بكده  ويا رب يكون الحوار عجبكم واستنوني تاني من قهوه جديده وناس جديده
وحوار جديد
شكرا 

شاركها في جوجل+

عن عبدالعزيز علي